खुशबू वाली सुगंधा का सच्चा अनुभव

Pranam guruji
Mera naam prateek hai, aur Mai 29 Saal ka hu. Aapke channel ko aaj YouTube pe dekha Maine, aur Kuch anubhav bhi sune. Aap bohot acha kaam kar rahe hai, kyuki dukh batne se Kam hota hai aur Khushi batne se badh jati hai. 
Kuch logo ke liye ye anubhav Khushi dene wale hote hai, magar Kuch logo ke liye ye anubhav Kisi darawne sapne ki tarah. Aur aaj Mai koshish karuga ki bachpan se lekar aaj tak jo Kuch mere sath ghtnaye hui hai, aapko vistar se bata paau. Aur aapka marg_dharshan bhi prapt kar saku. 
Maine apne anubhav’o ko 4 bhago me baat Diya hai, jisse ki aapko aur aapke madhyam se sabhi logo ko in anubhav’o ke beech ke farq bata saku.

1:- BACPAN ke anubhav:—— Mai tab bohot Chota tha, shayad 2nd ya 3rd me padhta tha. Aksar mujhe raat me ye feel hota tha, ki Jaise mujhe koi dekh raha hai. Raat ko sote samay achanak se, Kisi khusbu ke Karan meri need khul jati thi. Aur Mai apni mummy ko jagata tha ki, “mummy hall me koi aunty hai”. Wo perfume wali aunty thi meri tab. Maa mujhe ye keh Kar sula deti, ki koi ni hai waha aur na koi khushbu aa rahi hai. Tumne darawna Sapna dekha hai. Aur mummy mujhe sula deti thi. But us waqt bhi Mai ye janta tha. Ki wo aunty roj aati hai perfume laga kar mujhe dekhne. Wo hai, Maine unki Payal aur chalne ki awaj suni thi, aur roj sunta tha aur Mai koi Sapna ni dekh raha tha. Wo sach me thi. Magar Ghar me dadi, papa or mummy in logo ko wo smell ni aati thi. Sirf mere liye aunty aati hai perfume lekar. Aur itna Soch Kar so jata tha.
Bachpan me sirf khushbu se pehchana Maine unko. Jab bhi wo khusbu aati, Mai samjh jata aunty aa gayi. Kai baar to Mai wait bhi karta tha. Kyuki wo sugandh mere man ko pasand aane lag gai thi, but Mai thoda “Dara hua bhi hota tha”.

2 :- 8th se 12th CLASS ke anubhav:——  ye sab chalta Raha guru ji, kyuki mere mummy Papa dono working the, to Kabhi Kabhi mujhe ghar me dadi ke sath akele bhi rehna padta tha. Aur din me bhi wo perfume wali aunty ki khusbu aati thi. Ha magar Payal ki awaj din me nahi aati thi. Sirf bhini bhini si khusbu, din me Kabhi Kabhi, ha magar raat me roj. 
Baat tab ki hai jab Mai 10 class me pohcha. Mera first board exam aur Mai din raat us khushbu aur payal me hi khoya rehta tha. Ghar wale to samjhte the, ki Mai raat raat bhar jag Kar padhai kar raha hu. But na jane kyu , mera dhyan baar baar wahi jata tha.  Ab tak Mai ye jaan Gaya tha ki ye koi supernatural power hai. Koi perfume wali aunty nahi hai. Ye koi bhoot ya bhatak_ti hui aatma bhi ho sakti hai. Jab bhi Mai Us energy ke bare me sochta mere rogte khade hone lagte, magar phir bhi mera dhyan wahi jata.
Baat 12th class ki hai, ab wo khusbu pehle se jyada tej hone lag gayi thi. Aur payal ki awaj me bhi badlaw, Mai mehsus karne laga tha. Ab wo awaj Kisi ke chalne ki ni thi balki, Mujhe aisa lagta tha , ki mere bedroom ke bahar koi aurat ghungru pehan Kar nach rahi hai. Aur meri need khul jati. Mai gate kholta aur waha koi ni hota. aur phir ek raat , Maine uski parchai pehli baar dekhi. Sirf parchai, mujhe ache se yaad hai Mai soya ni tha, need Lagne ke baad, isse pehle ki Mai gehri need me jata. 9 ya 10 feet lambi aurat ki parchai, aur ek khushbu mere bed ke paas bani. Aur use dekh kar Mai jor se chillaya. “Bhoot bhoot ” Aur meri awaj sun kar sabhi Ghar wale aa Gaye. Mai 12th class me tha. Aur mummy se lipat kar rone laga tha. Papa ne har jagah light jala Kar dekha, but koi ni tha ghar pe. Is incident ke baad kafi dino tak mujhe koi anubhav ni hua. Aur ek din school se Ghar aate waqt, mai yahi Soch Raha tha ki 2 mahine ho Gaye, sach batau to us khushbu ko Mai yaad Kar Raha tha us din. Aur usi raat ko wo energy phir aai, magar haqiqat me nahi, is baar mere sapne me. Shayad wo samjh gayi thi, ki Mai abhi usse darta Hu.
 Mere bedroom ki window se, ghar ke samne wala lawn dikhayi deta hai. Maine sapne me usi lawn ko dekha, aur ek parchai dekhi kisi ladki ki. Aur wo nach rahi hai. mujhe ghungroo ki awaj bhi aati hai. Aur meri need khul jati hai. Mai Jaise us khidki ko khol ke dekhta hu lawn ki taraf waha koi ni hota. But us pure lawn me bhikhri hui wo bhini bhini si khushbu, mujhe bata deti hai. ki wo aayi thi, aur lawn me dance Kar rahi thi mere liye.

3 :- Engineering ke waqt me anubhav:——- Mai 12th pass kar chuka tha, 2008 me aur iske baad hi maine us Shakti ko pehchana. jab mujhe akele rehne Ka Awsar prapt hua, Apne hometown, mummy aur papa se door. Apni state capital me, Maine ek engineering college me admission le liya. Kyuki bachpan se hi, Mai Akela rehta tha, to mujhe akelapan pasand bhi tha. Isiliye maine hostel ki bajay, college ke paas hi ek 1 BHK flat rent pe le liya. Papa mummy mere flat me sab kuch arrangements karke, wapas home town chale Gaye.
Mujhe do teen dino tak to koi anubhav ni hue, waha us akele flat pe. Phir ek din Mai college Mai baith kar soch raha tha usi khusbu ke bare me. Aur ab tak mujhe ye yakeen ho Gaya tha. Ki agar wo koi aatma bhi hai. To wo ek good spirit hai, ek achi aatma hai. Wo Mera bura kabhi ni karegi.  
Din me, Uske bare me Mai Soch Raha tha, aur raat me mujhe wo khusbu aayi. Ghar ki baat aur thi, but Yaha Mai Akela tha. Us khusbu ke aane bhar se, Mai buri Tarah dar Gaya. Aur raat bhar so ni paya. Raat bhar light jala Kar rakhta. Sunder kand aur Hanuman ji ki photo bhi sath me lekar sota. 
Phir Kuch Dino me mujhe ye ahsaas hone laga, ki mere sone ke baad mere bed pe koi aakr baith jata hai. Lekin jaise hi meri need khulti, waha koi ni hota, sirf us khusbu ke alawa.
Kabhi Kabhi, mujhe aisa bhi lagta, Jaise sote samay koi mere sir pe hath fer Raha hai, ek dum mulayam hath, us samay mujhe yahi lagta ki mummy mere sir pe hath fer rahi hai, but jab mujhe yaad aaya ki mummy to yaha hai hi nahi. To meri need khul jati aur waha koi ni hota , sirf us khushbu ke alawa.  
Us dar us anubhav ko, Mai shabdo me bayan ni kar sakta. Magar ek taraf jaha mere sharir ko dar lagta tha. Wahi mere man me, ek ajeeb si Khushi aur shanti bhi thi. Man se to mai chahta tha, ki wo Aaye aur roj raat ko mujhe sulaye. Lekin mera sharir mera sath ni de raha tha. Jaise taise Maine is sharir aur man ki Jung ke beech, apni degree khatam ki. Aur final year me campus interview me select ho Gaya. Aur 2012 me degree khatam karke Maine apni job join kar li, Ek MNC me.

4:- JOB me anubhav :——- meri company India ki ek metro city me thi, aur 2012 se lekar abhi 2020 tak Mai same city me hi rehta Hu. Aur Yaha bhi meri perfume wali aunty aane lag gayi. 
But, ab unke aane pe mujhe ahsaas ho jata tha, ki wo aas paas hi hai. Wo nirantar badlav Kar rahi thi aane me, mere bachpan se hi. Magar ab wo aur  Akram dhang se aane lag gai thi. shayad apni shaktio se dheere dheere, parichay karwane Ka unka ye tariqa ho. 
 Ek vibration mujhe pure mahol me mehsus hone lagti thi, aur uske baad mere sharir me. Jaise ek hard wave, kisi khas frequency pe chod Di gayi ho. Aur mere rogte abhi bhi khade ho jate the, mera sharir kapne lagta tha, jab ki Mai ab Bacha ni tha, mai ab 23 Saal ka ho chuka tha. Ab meri aadat pad chuki thi, ghar me agar koi halchal ho bhi rahi ho, to Mai jyada dhyan ni deta tha. Ha jab wo mujhe touch karti, ya mere ball ko sehlati tab Mera Dil, jor jor se dhadkne lagta. but Mai chup chap ek hi condition me leta rehta. Magar, Mai Jaise hi piche mud Kar us shakti ko dekhne ki koshish karta, waha koi ni hota. Aur ab Mai khud pareshan hone lag Gaya tha in bato se. Aur Maine doctor ko dikhane ki Sochi. Mujhe Lagne lag Gaya tha, ki kahi mai pagal to ni hu. Aur mai isi tension se, drink karne lag Gaya. Mai roj office jata , sharab pita aur so jata ghar aa Kar.
But phir ek din us shakti ne kuch mujhse Kaha. Mere kaan ke paas, mere sote samay. Mai uski wo mithi si awaj, aaj bhi yaad karta hu, to man ko bohot shanti milti hai. Lekin Mai us waqt need me tha. Phir wahi same sentence, mujhe Sapne me bhi sunai Diya. Maine savere uth Kar, us sentence ko yaad karne ki koshish ki. to mujhe laga, ye to Sanskrit ke shabd hai. Unme se Kuch shabd mujhe yaad the, to Maine unko likh Kar hindi me translate karne ki koshish ki, google translate se. Jaise
           pibati = means Pina           Dracha_ras = sharab ya madhira           Kimarth = kyu ya kis Karan
That means, to itne Dino se, wo mujhse ye Puch rahi thi, ki “kis Karan se tum sharab pite ho??”Aur ye mere liye kamal ki khoj thi guruji, ab Mai usse baat bhi kar sakta tha.Dheere dheere Us shakti ne, mere sawalo ke jawab dene bhi shuru kar diye. Lekin directly agar mai Kuch aise bol Kar puchta, to mujhe uska koi jawab ni milta tha. Lekin agar mai man se sochne lagta koi baat, “ki kash mai kabhi Jaan pata, kyu itne salo se wo shakti aati hai roj mujhse milnne?”.
Mujhe usi raat ko iska jawab mil Gaya. Lekin is baar phir kuch Sanskrit ke words ko mujhe hindi me decode karna pada. Aur mushkill ye thi ki Sapne me kuch hi words Mai yaad rakh pata tha , Jaise ki
           Shat_tamah= saikdo (100th)            Varsham=.     Salo se            Twaim=.           Tumse            Snehayami_hi= pyaar karna
That means “Mai tumse 100 saikdo salo se pyaar karti Hu.” 
Aur phir, ye Jan Kar jaha ek taraf Mera man ko Acha lag raha tha, wahi mera sharir dar raha tha, apni suraksha ko lekar. Dusri raat wo shakti mere bed pe aakar baithi,. Aur mai humesha ki tarah dusri taraf ghum kar leta hua tha. Wo kabhi bhi mere samne se aakar bed par nahi baith_ti thi , balki mere piche se aati thi, humesha meri pith ki taraf se. Aur mai saas badh kar, bajrang Bali ka naam man me japte japte, kisi tarah leta Raha is baar, Mai so ni raha tha. Ye haqiqat me ho raha tha. Aur dar ke mare, mai bed pe lete lete kaap raha tha. Usne apni pyari, mithi aur bohot hi komal awaj me, mere kaan me ek line boli. maine man me socha, ek baar aur bol do. usne dusri baar bola mere kaan me. Maine confirm karne ke liye, ki ye ladki kya sach me mere man ki baat jaan leti hai , “wo thodi der bed pe hi baithe baithe mere sir ke balo ko sehlati rahi” , maine teesri baar apne man me Kaha, phir se ek baar bol do. Usne haste hue, phir se mere kaan pe bola same sentence. aur phir wo uth kar waha se chali gayi. Aur turant maine wo diary uthai aur us sentence ko decode Kiya, Kuch shabd mujhe abhi bhi yaad hai .Sentence tha
           Aatmana_nam=  apne aap ko pehchano            Ekyam=.  Oneness, unity or  identical            Tuam=.     Tum                         Mum=.      Mai
” tum aur Mai ek hai, apne aapko pehchano”. 

Aur Mai tab samjh Gaya kyu ye mere man ki har baat jaan leti hai. Shayad hum waqai ek hai. 
is 1 janwari 2020 ko. Maine man me socha, ki Mai usko dekh raha hu.maine man me ek image banai apne ki itni pyari awaj, itne mulayam hath hai tumhare, to tumhara chehra Kitna sunder hoga? Mai ulta let kar ye Soch Raha tha. aur Wo mere bed pe meri pith taraf baith kar mere Baal sehla rahi thi. Usne achanak jawab diya “abhi tum iske liye tyaar ni ho”. 
Maine unse pucha, ki hum pehli baar kaha mile the?, isi lok me ya kisi aur lok me? Mai sab kuch janna chahta hu.tum kis jagah se ho, mai kaha se hu?  Us shakti ne huste hue kaha “waqt aane par sab pata chal Jayega”. 
Maine ye bhi bola ki mai janta Hu, tum apni asli taqat ya asli sharir se mujhe touch nahi kar rahi. Mai khud ki pariksha Lena chahta hu. Maine jor se bola, Apne asli hatho se, mujhe touch karo na??. ” Ni Kar Sakti, tumko taqleef hogi” ye bolkar wo uth kar chali gayi. Ye sabhi bate uski, Sanskrit me thi maine inko decode karke yaha likha hai.aur jo bhi sawal maine puche the, wo sab maine man me image bana kar puche the. Bolte waqt uski mithi awaj me ek rukha pan tha, jaise uska gala bhar aaya ho. Aur aansu behne lage ho.
But new year ki raat ko, mai uske bare me hi sochte sochte so gaya. aur sapne me, mujhe ek bohot hi khubsurat si aurat ke dharshan hue. Jiski khubsurti ko mai shabdo me bayan ni kar sakta. itna khubsurat chehra maine aaj tak nahi dekha, aur unke badan se nikalta hua tej, bhi maine aaj tak ni dekha tha. Jaise kai surya ek sath asman me nikal aaye ho. Itni roshni unke sharir se nikal rahi thi. Unki height laghbag 8 ya 9 feet aram se rahi hogi. Aur unke badan ki us safed roshni me nahaye hue, kamar ke niche tak, unke reshmi, kale , lambe baal. Aur ek saree Jo adhi pile rang ki thi, aur Kuch hissa uska doodh ki tarah safed , jise unhone ghughat ki tarah odh rakha tha. Unhone,saree yaha dharti ki aurato ki tarah ni pehni thi. Wo saree, apne aap hi upar se niche tak unke badan se lipti hui thi . usne meri manokamna puri kar di thi mujhe apne darshan de diye the . aur uske baad maine unka nrtya Yani dance bhi dekha. 
Magar unke chehre pe ek bebasi thi. Aur aankho me thode aansu. Mai jaan gaya tha, ki wo bebasi kyu hai? Aur maine unka dance dekhte dekhte, man me kaha tum mujhe chu sakti ho mujhe dard hua bhi to seh luga. Aur itni der me mujhe laga ki kisi ne meri pith pe, jalta hua tawa rakh diya hai.aur meri need khul gayi. 
Koi ni tha mere room me mere siwa. Siway us bheeni khushbu ke matlab wo yahi thi. Wo dekh rahi thi mere Sapne ko ya mujhe Sapna dikha rahi thi. Mujhe ni pata gurudev. But maine unka sparsh jhel liya tha. Kuch Dino tak thoda daag tha meri pith per, magar phir apne aap hi gayab ho Gaya.

Conclusion:-  29 Saal lag Gaye mujhe,  but abhi tak mai ye bhi ni jaan paya hu, ki ye shakti kon hai.??  Shayad jab wo mujhe apne dharshan degi,  ya jab Mai is kabil ban jauga ki, unke tej ko bardast kar saku. tab mujhe pata chal Jaye, ki wo kon si shakti hai. abhi to puchne per, wo sirf yahi bolti hai har baar “jab Devi maa chahegi, tab sab jaan jaoge” . Abhi tak us roop ko maine sirf sapne me dekha hai. Baate bohot ki hai. aur ek baar uska sparsh bhi bardast kiya hai. Halaki Uske baad mujhe 2din bukhaar bhi aayi hai. But koi baat ni, Jo dard wo saikdo salo se seh rahi thi mere liye , us dard ke samne ye kuch bhi ni. But ab mai ghabrata isliye Hu. 
Kyuki Mai koi sanyasi Nahi hu. Jo Mai ab tapsya karke, khud ko us Shakti ke kabil bana lu. Mai apne maa baap ka eklota beta hu, aur unka eklota sahara bhi. Samjh me ni aata jis din mere ghar wale, meri shadi ya mere ghrasta jeewan ke bare me sochna start karege , us din mai kya karuga. Mai us Shakti se pyaar karne laga Hu. Aur apne maa baap se bhi bohot pyaar karta hu.
Aap hi kuch marg bataiye. Maine us Shakti se bhi, baat karne ki koshish ki is bare me. Lekin uska har sawal pe bus yahi jawab hota hai “Jo Devi maa chahegi wohi hoga, tumhare ya mere chahne se kuch ni hota hai , Kisi bhi sansar me”. 
Kuch anubhav aur bhi hai jaha “sugandha”. ji ha Mai isi naam se bulata hu unko. Ab Mai unko perfume wali aunty to bol ni sakta . Aur unhone bhi, apna naam ya apni shakti mujhe ni batayi hai abhi tak. To maine hi unke, sharir se aati hui manmohak sugandh ke karan unka naam “sugandha” rakh liya hai. 
Ji, kuch anubhav aur bhi hai , balki bohot sare anubhav hai mere 29 saal me. jab sugandha ne meri Jaan bhi bachai hai. aur aise aise waqt me, Mera sath Diya hai, jab Kisi ne nahi Diya Mera sath. But, story bohot hi lambi ho jati, to Baki ke anubhav mai do teen din me share Kar duga. Jab bhi office se time milega.

Mata Rani ki jai hoMata Rani Sabka kalyan kare